२०८२ मंसिर १४, आईतवार ०८:१८
जनकपुर— ढल्केवर सडक खण्ड अन्तर्गत लक्ष्मिनियादेखि महेन्द्रनगरसम्म तीनवटा आकाशे पुलको निर्माण कार्य शुरु भएको छ ।
सडक डिभिजन कार्यालय मुजेलियाद्वारा जनकपुर–ढल्केबर ६ लेन व्यापारिक राजमार्ग अन्तर्गत छुट्टा–छुट्टै स्थानमा १० करोड ५० लाखको लागतमा तीनवटा आकाशे पुलको निर्माण कार्य शुरु भइसकेको छ । सडक डिभिजन कार्यालय जनकपुरधामका इन्जिनियर उज्ज्वल झाले दिएको जानकारी अनुसार एक महिनामै माटो खनेर पिलर खडा गर्नेसहितका काम भइरहेको उनले बताए ।
पैदल यात्रुहरूको सुविधाका लागि मधेश प्रदेशको राजधानी जनकपुरधाममा उत्तर तर्फबाट प्रवेश गर्ने सो सडकमा निर्माणाधीन आकाशे पुलको काम पुरा भएमा सवारी दुर्घटनामा कमी आउने सडक डिभिजन कार्यालय मुजेलियाले जनाएको छ । पैदल यात्रीको बढी चाप भएका भएका राजमार्ग अन्तर्गत धनुषाको लक्ष्मीनिया गाउँपालिकाको लक्ष्मीनिया बजारमा, क्षीरेश्वरनाथ नगरपालिकाको महिला विकास चोकमा र सखुवा चोकमा लागतमा छुट्टा–छुट्टै तीन वटा आकाशे पुलको निर्माण कार्य भइरहेको छ ।
सडक कार्यालयले जनाए अनुसार चालु आर्थिक वर्षको असार मसान्तसम्म सम्पन्न गर्ने गरी लक्ष्मिनियामा ३ करोड ४२ लाखको लागतमा, महिला विकास चोकमा ३ करोड ३५ लाख र सखुवा चोकमा ३ करोड ४५ लाखको लागतमा सो आकाशे पुल निर्माण भइरहेको छ ।
निर्माणाधीन तीन वटै आकाशे पुलको उचाइ ५ दशमलव ६ मिटर, लम्बाइ २ ९ दशमलव ४ मिटर र चौडाइ ३ मिटर रहेको कार्यालयले जनाएको छ । आकाशे पुलले शहरको सौन्दर्यकरण सँगै यसको प्रयोग गरेर सडकबाट वारपार गर्न सजिलो हुने र यसले दुर्घटनामा कमी आउने डिभिजन कार्यालयले जनाएको छ ।
